Kнигаос

Udmurt

 

Ачим сярысь.

Юрий Вэлла.

Варьеганэз Новоаганскен шоссе сюрес герза, со шорын ик бадзым выж вань. Одиг тудву но сое шелепез сямен ярдуре уз палдыты – выж валаса, чуказеез сярысь сюлмаськыса жутэмын. Со дорысен уйпал но шундыпуксён вискы жыны иськем пала вамышъяд ке, одно ик адзод пеньырзем вашкала юбо нергеосты но лиялъёсты. Та интыын куке но Айваседа (Вэлла) Калалэн стойбищеез вал. Чапак отын ик 1948-ти арын южтолэзе мон вордски.

Картэз кулэм бере Ненге песянае, чумзэ но пужейёссэ матысьёсызлы куштыса, нылпиосыныз чош берен анай-атайёсыз пала кочиз. Таосыз соку Сеттэй ты палан уло вал, Варьеган возти бызись Хыпитостылэн ярдуръёсаз.

Быдэс улон флаг тус «гордэктон» вакытэ выжыосы, Айваседаос, ваньзы ик, колхоз шудбурез утчаса, кыти пужеен, кыти пыдын Варьеган гуртэ вуизы. Колхоз улон оз пишмы – Варьеганын Айваседаос берпумети пужей анайзэс быдтоно луизы.

Уйпал шаерысь тросэз нылпиос сямен ик, мон но зоскыт интернатын быдэсмоно луи. Татын ик, тодам вайисько на, Сталинлэн кулэмез сярысь иворез кыли. Огшап ортчыса, нырысети спутникъёс космосэ лобизы, борсязы – Юрий Гагарин. Нош ми – уйпал нылпиос, инкуазьмылэсь люкем но калыкмылэн йылолъёсыз бордысь ишкалтэм макеос, гортылэм борддоръёс вискын ялан будыны курадзим.

Пичи дыръям мон туж яратыли улонэз адзем пересьёслэсь верамъёссэс кылзыны. Соос полын вал Василий но Антон вынъёс – Епаркинъёс, Айпин Ефим но мукетъёсыз. Соос мыным аслам ошмесъёсы доры берен берытскыны юрттизы, дыр. Быдэ вуыса но тундра калыкме сак кылзыли: Иуси Кулиез, Аулиез но Ойсяез, Казамкин Андреез.

Огъя вераса, лулме пыд вылаз йыг-йыг султытизы матысь адямиосы – Ненге песянае но Хопме песятае.

Казна пойшурась луыса ини мон йыгаськи Москваысь А.М. Горький нимо литературая институтлэн заочной амалэн дышетскон ёзэтаз. Озьы мон нырысьсэ Москвае вуи но калыкъёслэн та аспортэмлыко «пуртызылы» туж синмаськи. Дышетскон капчиен оз сётиськы. Озьы-а, тазьы-а, но 1988-ти арын диплом ужме зеч ути. Кылбур книгае «Вести из стойбища» нимаськиз.

Мон али но кык ужен вырисько, шуыны луоз: пужей улеме утисько-вордисько, соин чош ик тодись муртъёслэсь калыкмылэсь кылоссэ (фольклорзэ) бичасько. Таиз уж мыным вуонозэ возьматись синучконэз утем кадь потэ, котькудиз отчы учкыны мед быгатоз.

2000-ти арын монэ Россиысь писательёслэн огазеяськоназы кутизы.

Али аслам пужейёсыным Аган шур котыръёсти бергасько. Милям ёросмы улисьёсыныз чош 1978–79-ти аръёсы Сургут ёросысь Нижневартовске витьымтэ шорысь гожтэмын вал. Калыклэсь мылкыдзэ юась ой вал. Марлы, пе?

Та улонам коньытсэ но, курытсэ но веръяны кылдиз. Кылбуръёсын вить книгаме потти, кык йоскалык музей, одиг сельсовет но кык школа кылдыти, кудъёсаз нылпиос анай кылзэс дышетыны быгато. Коня ке арзэ пойшурась луыса ужай. Ужме огпол гинэ данэн оз пусйылэ. Вьетнамын ожмаськон мыныку, отчы куриськыса, вазиськон гожти вал… «Плоскостопие» шуиськись шекме шедьтыса, стройбатэ келязы. Вань ож тылжуослы жотрак пумит луись мылкыдъёсын «Охота на лебедей» кылбур книгаме гожти вал. Ньыль пол монэ «поллиськон» судэ но отчазы. Куиняз зэмен лыдъязы, ньылети вазиськонэ Европаысь судын эскериське.

1992-ти арын улон юртэ сутскыны шедиз. Со дырысен ёрмонысь потыны уг быгатиськы ни. Вань нуллон дисе полысь укмыстон процентэз  – эшъёсылэн кузьымъёссы, улон интыысьтым жыныез пала жок-пукон котвръёсы – школа-интернатысьтым «синпельёс».

Та дырлы, ярам ай, кемалась кутскем ужме йылпумъяны пормыти – жуаса бырем выль книгалы чаклам рукописьме выльди. Нимыз – «Ветерок с озера». Соин чош ик ненец студентъёслы дасям «Сказание о любви» нимо книгаме адзыны кылдиз. Выль гожтэмъёсме печатланы юрттэт курыса, спонсоръёс котырти бызьылисько. Уг аналтиськы интынимъёсъя кыллюкам дасян ужме но. Сое «Река Аган с притоками» ниманы чакласько.

Нош Инбам мон понна выль курадзон малпам – сизьылысен больницаости ветлисько,куинь операциез чидано Луи. Бурмонэ матын ни кадь – но, кин тодэ… Адзонлэн ведь аслаз нетъёсыз. Таче секыт дыръёсам эшъёсы ке ой юрттысалзы, ойтод, мар карысал ни асэным… Озьы но та Дуннеямы мон асме шудолэсь но шудо адямиен шодисько…

 

Гожтэмын 2003-ти арын Южтолэзьлэн 12-ти нуналаз Нижневартовскын.

 

Чуквыл триптих.

1.

Чукна вазьгес сайкаськод но укно янак бордысь капчи катанчиез палэнтиськод, ураме учкиськод, адзиськод: юрт возысь зус вылын етиз пислэг пуке. Вань дись котырыз солэн тодьыен-пурысен суро, гадьыз – яркыт. Тылыё-мамыко малпаннъёссэ бергатъяса-волъяса, тылобурдо йон гинэ пуке. Волэм кадь йырзэ тон пала но калленак кичольтэм каре.

Со шоры шунытак учкиськод но ымныр кисыриосыдлэн волямзылы паймиськод. Сэре, нокин адзонтэм дыръя кадь, ас поннад пальышамед но потэ. Озьы сумбрес вотэдлэсь, кудиз тонэ чыжыса-мырзыса сямен валесысьтыд султытиз, ортчем гудырилэн шодонтэм чаломемезлы тупась куара гинэ кыле на. Тодэ ваён куаралы тупась. Но жоген со но озьы ик сайкась нунал пушкы сылме…

 

2.

Кикурысьтым  мынам шунды жутске,

Шунды сиос сайкатъяло бурдоосты.

Кикур вылам зоред лэйка –

Артысь нюръёс кунокуае отё туриосты.

Шальтрам трактор гурезь уллань тинь гызмыльтэ,

Зукыртись зозъёслэн куаразы – пу пилён.

Вахалюп корказьысь эшъёссэ пуные ни чортэ,

Кузёезлэсь солы уг шедьы тышкаськон.

Кызъёс йылын адске ёркам пилем – пужей…

Сикын нош кин ке йон-йон латькетэ.

Филя апай кенсын жингыр каре – модей![1]

Тинь Варьеган выль нуналзэ озьы мытэ.

Нош со кикур пасьтанаям

Чукна Шунды эктэ ёрос тырам.

 

3.

Туж вазь чукна,

Шунды бадьпу ваен шудон  дыръя,

Мон синйылти та суредэз –

Кызьы тон дисьтытэк пырид юз тулкыме.

Лобазы, эрик курыса,

Пельпумъёсыд но киосыд,

Шудэн окыныса.[2]

Секыт узвесь музэн вожан кылдиз пушкам,

Бен уката ик – та шурлы.

Я, марлы-о нодтэм шуред

Монэн чошатсконтэм туннэ шудо?

Марлы мон уг, со Шур

Йотске ненег гопед борды – котад?

Марлы мон уг, со шур

Веша та мугордэ аслаз пушказ?

Со шур мон луысал ке та вие –

Туж жикытак гинэ мон ворсасал

Чорк гадьёстэ дыректылись киосыным…

Нош гадьёсыз ук та ныллэн?!

Эх-ма, гадьёс –

Быгыльскылэм сяська йыръёс.

Огез но чебер кыл уз возьматы

Зэм чеберзэс но сыче мусозэс…

Уз лу суреданы лэйкыт макеосты –

Йырез сурасьёсты…

Нош со аксым[3] шуред

Вутске ини чыртывожъёс дуре,

Волэм чыртывожъёс дуре.

Отчы марзан кисьта –

Шунды азьын яркыт выре.

Я, мар понна шурлы, пе,

Со быдза шудбур?

Яке со артэ тупам вылысь гинэ,

Яке озьы Инмын кылын гожтэм гинэ –

Со юг чукна вакыт.

Мон, Шур сямен дырекъяса,

Тонэ пушкам гучыктысал –

шапыкъёслы шумпотыса.

…Дисьтон-малпан ке луысал…

 

Юрий Вэлла.

 

Вазез триптих.

1.

Адзисько улыго укно пыр,

Кызьы зонгыра бусыын чагырлык.

Куакъёс вылын, Шунды улын

Тылгизьыен чильпаськыло

Азвесъёсын пужъятэмъёс.

Додьысюлъёс зукыртыло

Пужнэс лымы вылти.

Котыр – сайкыт, чалмыт.

Лулы мынам,

Тон шумпотод туннэ

Оло-а нош ик жожомод?

 

2.

Усиз та лымы

Туннэозь адзымтэ –

Тодь-тодьы но тодьы.

Потиз адями кыралэ –

Пур-пурысь но пурысь.

Со адзе лымыё дуннеез:

Коркаез, капкаез, додьыез.

Додьыос нош тани

Инъёсы ик дасесь лобзыны.

Со адзе пилемо инбамез –

Пилемъёс – лызпыро мамыкъёс –

Омырын лэйкало капчияк –

Лымы пыры кариськыса,

Ымныр вылын шуналляло,

Пельпумъёсты шобыртыло,

Оло нош куаныло

Таче пумиськонлы…

Озьы сылэ со адями –

Таре ни юг-юг со тодьы…

Талэсь азьло со улылиз –

Пурысь полын пурысь.

 

3.

Туннэ чукна та зор

Сюресме ваментиз.

Шуиз вал песятай –

Тыче, пе, зор вае

Зеч ужъёслы удалтылон.

Тани вамышъясько

Гурт шорыти –

Уг ватиськы мон ымнырме.

Чылкыт вуэн

Удалтытись зоръёс тырмытъяло

Лёгем пытьыосме.

 

Тулыс триптих.

 

Портэм буёло инбам.

…Волак усьтиз куанер пойшурась

чумзэ – улонтизэ. Мур шокыштиз.

Соку ик чум пушкы инбам ыбышкиз.

Дэлетлы но шудлы со пормиз. Со

дырысен озьы ик таре улэ ни адямиен

уртче.

Ненги песянайлэн выжыкылъёсысьтыз.

 

 

Мон улисько кильтыр-турлы

Инбам улын.

Буёлъёсыз солэн огшорыесь:

Инбам луэ мозмыт,

Инбам луэ ненег,

Жыны-урдсо сумбыр,

Выльлэсь но выль,

Шулдыр,

Вешаськисьтэм,

Чыж горд,

Маскаръяськись,

Коштан,

Югыт,

Выль кен кадь – син кыскись

Аслаз чебереныз,

Шуныт сюлмо,

Нылпи сямен, лябыш но

Утьыны курись,

Соин чошен ик

Батыр кужмын тырмытскемын.

Чуж,

Вож,

Лыз,

Фиолет,

Инбам луэ

Шумприч яке

Ас интыяз пумем маке.

Инбам луэ зок куараё

Яке нош воксё – бак.

Улыг луэ,

Вылыг луэ,

Нап но луэ

Аслаз кизеръёсаз.

Кос но…

Кот но…

Азвесямын но…

Зарниамын но…

Лызпыръямын но…

Туссэ пуктэ дан поттылись

Чиновниклы укшатскыса,

Яке нош ненец кадь

Чик огшоры кариськыса.

Мынам инмы тэре

Нап-чуж пиялае,

Кудиз тини кияз

Нылашелэн – паймонэзлы.

Со тэрылэ волмыт усьтэм

Пырон пасяз чумлэн,

Отчы оте тонэ песянае мынам.

Тынадаз но тэре со укнояд –

Волмыт но укнояд,

Югыт но укнояд,

Овол шуккылэмын отчы

Сьодыр кечат гожъёс,

Кирос гожъёс.

Солэн чагыр укнопужыосыз,

Зукыртыло кыметъёсыз,

Тодьы сяськаосын – косяказьыз.

Солэн – анаедлэн ымныртусыз,

Портрет вылын ке но,

Кудиз – пальышалляз.

Сыче пальпотонэн инбам быгатылэ

Бусы вылэ гачолскыны,

Зарезь вылэ но выдыны

Яке нош тундраез шобыртыны –

Секыт пойшурамез борсьы

Шутэтскыны.

Яке чорыганы ветлэм борсьы,

Оло нош уриськем борсьы.

Инбам быгатылэ дунне вылын

Жужыт луылыны

Кизилиё уллёослэсь,

Югдись шундыослэсь,

Музон-турлы инсьор Дуннеослэсь.

Быгатылэ инбам луылыны

Капчиезлэсь но капчигес,

Чалмытэзлэсь но чалмытгес –

Бубылилэсь бурдзэ выретэмез сямен

Уз лу сое шодэм – кылэм…

Луэ Инбамез лэсьтыны…

Уг !

Уг !

Уг !

Мукетсэ инбамез мон

Уг тоды ноку.

Уг!

Мукет сямен, мукет инбам

Уг луылы ноку.

Со кылдэмын озьы –

Инбам ик луыны,

Инбам ик кыльыны.

Тини сыче со – мынам инбаме,

Портэм но турлы буёло.

Тынад но улонэд –

Солэн улаз.

 

Сыче портэм инбам.

Умойзэ гинэ инбамез эн бырйы, пие.

Зэмос адямилы, ужез яратись

пойшурасьлы но чорыгасьлы котькычеез

но инбам яра улыны.

Песятаелэн индылонъёсысьтыз.

 

Ку пилемъёс овол инмын –

Инбам но огшоры инбам кадь –

Огшоры.

Ку вылиын адско ни пилемъёс ,-

Овол. Инбам сыче ик – огшоры.

Чилектылэ ке пилемо инбам пушкын –

Инбам сыче ик – паймонтэм маке.

Нош шуак юг нунал шорын

Султэ ке йыр вадьсы дуак

Огнын пилем, кесям маке –

Соку инбам тупа ини

Ожгар бусыослы,

Нош пилемед –

Музъем ужаседлы,

Кудиз бертэ пензем

Юрт бервылаз.

Нош инбамлэн нимыз

Сыче ик кыльылэ – Инбам.

Солы ке кылдэмез солэн

Инбам гинэ луон понна.

Нош адями кыле

Адямиен соку гинэ,

Ку со улэ Адямиын.

– Кызьы нимаськоды зоро куазез?

– Зоро-кото куазен.

– Кызьы нимаськоды ужзэ вунэтылись муртэз?

– Азьтэм муртэн.

– Нош аксым но акар бускелез?

– Сычезэ, пе, варвар шуыло.

– Нош кас сюлмо пойшурасез?

– Тазэ, пе, браконьер каро…

Нош тон кыче инбам улын

Улод, чуказее пырод?

Кыче нимын тыныд вазиськоно?

 

Весяклы инбам.

– Мар ке мон нош ик, пинал дыръям

сямен, берло дыръёсы чемгес инме

учкылыны кутски.

Лулысь-лулэ вераськонысь.

 

Мар кулэ

Ог-огзэс яратись муртъёслы? –

Сюлэмез сюлэмен герзатись

Юг инбам.

Синлысъёсын шудо синвуосын

Югдись инбам.

Пиям кышно марлы шумпотылэ?

Юг инбамлы,

Соиз жутэ ке укноысь катанчиез,

Бурдэз сямен,

Юг инбамлы, тэртытисьлы

Нылпи юртлэн пуш тодьыяз

Туриослэсь кырзанъёссэс –

Выльлы шумпотыса гурламъёссэс.

Нош мар кулэ вордскисезлы? –

Син азяз – юг инбам,

Инпыдсозь – куараос.

Мар сярысь сюлмасько

Вордытись анайёс-атайёс?

Мед учкозы нылпиоссы оскись синмын

Югыт инбамзылэн зэмлык шораз,

Ас катазэс, солэсь нырзэ

Учкылыса медаз сылэ синмысь синме

Ортчись вераськонын матысь эшен…

Мае нош сизёно сюрес мытись

Муртлы? Ингожъёсы вамышъясьлы?

Инбамез – ымныраз,

Инбамез – йырбераз,

Инбамез – паллянысь,

Инбамез – бур палысь,

Кык ласянь – пыкъясез,

Чемтыны сётисьтэм осконэз.

Медам со усь тузон сюрес

Вылэ.

Нош мар сярысь малпаськылэ

Сопал дуннеосы кошкись?

Бускель липет вадьсысь

Инбам сярысь,

Шурез вадьсысь бырылисьтэм

Аслаз но инбамез сярысь.

 

Песянае сярысь триптих.

 

Ненги песянаелы.

Тон кызьпулэсь но чебергес,

Тон Толэзьлэсь но моторгес,

Дорад мылкыд ыралскылэ

Тросгес – Горд Коньылэсь но

Трослы мыло но кыдогес.

Киосыд но сыче ненегесь.

Зульыло, тон овол, пе, чебер,

Куараед – пужымлэн зукырез.

Мон огзэ тодисько шонерен –

Вотъёсам выжыкыл пыртиськод

Чеберен, синпорен, каньылэн.

 

Ненги песянаелэн кырзанэз.

 

Мар гинэ медаз ужа песянае, со котьку

кырзалляз. Тазьы со кырзалляз мыным

киса – пыдкут вурылыкуз.

 

Тани нуныкелы мон кис вурылисько

Нгадьей-нго!

Пелляськись кезьытын медам кынмы со, шуыса.

Нгадьей-нго!

Нош ку бызёз со пойшуръёс сьоры

Кыдёкелэсь но кыдёке –

Медам зукыртылэ вал куасъёсыз.

Нгадьей-нго!

Со утьылоз пужейёсыз

Нгадьей-нго!

Шурысь со нельмаез поттоз

Нгадьей-нго!

Нош геолог ке луон кылдиз,

Кезьытлы пумит пыдаз

Кутчалоз та кисаез

Нгадьей-нго!

 

Чал-чалмыт.

Огъя верано ке, песянае мынам яратылэ ик вал вераськыны. Но куддыр, ярдур кузя вамышъянъяз, со дугдылиз но кежырес, капчи, вакытъёсын куасьтэм кизэ йыр вылам понылиз – чал-чалмыт сылимы Аган шурлэн лэйкыт тулкымъёсыз азьын. Чал-чалмыт. Но милям сюлэмъёсмы со вие оз чалмылэ. Соос озьы ик вераськизы куспазы, ог-огзылы мылкыдъёссэс сётылизы, та дуннеез шодылэмзэс ог-огзылы мадьылизы. Сюлэмъёсын вераськонэз уг луы валаны кыл-куараен. Но соос оръямъя мон ачим но кутскисько адзыны та шундыен тымем шурмес, нюръёс сьорысь кыдёкети лобись туриослэсь култыртэмзэс…- выль сямен. Таре мон но сюлмыным адзисько ни асьмелэсь стойбище шуонмес, улонтимы бордысь котькуд куараез, котькуд чаштыртэмез но котькудзэ ик лулскемез.

 

Кырзанъёс.

Пужей вордисьлэн кырзанэз.

 

Зор шапык мон мед луысал,

Синлысъёсад чеберъяськон понна.

Нгадьей!

Нгадьей!

Лымы пыры мон луысал –

Дисян сирес вылад шутэтскыны

Кобераса – дисьтылытэк.

Нгадьей!

Нгадьей!

Нош ку тон лобиськод

Пужей кыткет вылын,

Котыр лымы ёрос

Кырза тыныд гинэ –

Югдытскеме потэ ымныр вылад

Пальпотонэн.

Нгадьей !

Нгадьей!

 

Пужей вордись пересь Аулилэн кырзанэз.

 

Нош мар меда со – Яратон?

Та вашкала юан, валэктонзэ

Вазен но шедьтымтэ маке –

Туннэ сюлмаськытэ монэ.

 

Оло нош Яратон – со

Выль пытьыосыз

Тынад пужейёсын кыткетэдлэсь.

Лымы вылэ кылем – нартасюлъёс?

 

Оло нош Яратон – со

Выль чумы,

Кудзэ пуктим туннэ чошен

Лымы вылэ?

 

Оло нош Яратон – со

Выль куара,

Курадзыса пушкад вордиськыны вырись?

Кушетскыса ик сюлэмы

Витьылэ иворез чум пушкысь,

Иворез витьылэ кышномурт жуштэмысь…

 

Нош мар меда со – Яратон? –

Та вашкала юан,

Ортчем дауръёслы но малпаськон –

Туннэ сюлмаськытэ монэ.

 

Оло нош Яратон –

Лымы букос вылти

Лёгем сюрес – пиенымы

Лёгем сюрес?

Пумтэм-йылтэм лымы

Выльвыл – кузя но пасьтана –

Тундраез но нюлэсэз –

Огазе герзась,

Вашкала сюрес.

Вань азьпал выжыосмы

Та сюрести ветлизы…

 

Оло нош Яратон –

Асьмелэн нырысез нартамы –

Бурдоё додьымы? Сое

Нунокмы мудронъям но кузьмам

Асьмелы.

 

Оло нош Яратон –

Нырысети кышет кадь – тянтку?

Мунёезлы вурем сое

Тани нунок нылмы…

 

Нош мар меда со – Яратон? –

Ортчем дауръёсысь выжымуртъёсылэн но

Малпаськылон эсэпъёссы

Туннэ чемгес сюлмаськонэ

Вутто монэ.

Но та юан ик, шодисько –

Сюлмаськытэ ини пимес но

Асьмелэсь.

 

Пересь Ымчилэн пиезлэн гожтэтэз

сярысь опкелёнэз.

 

Ех-хо-хо-хов!

Укыр кунэртытиз монэ та гожтэтэд.

Ех-хо-хо-хов!

Тон гожтиськод, отиосад, пе,

Пасьтанады но портэмгес милям сярысь,

Мурт шаерын, тундрамылэсь палэнын.

Отиосад, тон шуиськод,

Шунды но портэмгес –

Милямезлэсь шундымылэсь

Уно поллы посьгес.

Жалятэк со сутэ мусо пиелэсь

Из борды, луое жиптылэм пось йырзэ.

Нош марлы-ай меда

Жиптоно-ай йырез луое?

Ех-хо-хо-хов!

Тон бинь вал йырдэ

Тодьы кышетэн,

Тундра палась лымы сямен

Со юзматсал оло тонэ.

Я, марлы уз лу ни меда

Йырез биньыны тодьы кышетэн?

Ех-хо-хо-хов!

Лулэз ик подиз кадь тынад гожтэтэд.

Ех-хо-хо-хов!

Тон гожтиськод –

Унояз вотъёсад адзиськод

Вордскем палъёстэ но чумдэ,

Асьме тыосмес,

Пилемъёсты йыр вадьсамы.

Жытъёсы, пе, кошкиськод

Эшъёсыныд уртче

Тыло шундылэн пуксёназ…

Мусое, пие,

Оло нош оз шедь-а тыныд

Чорыгез вордиськем палъёсад,

Шуръёсад?

Мусое, пие,

Оло быриллям ни асьме уллёын

Тынзян – сьолтэтад кутоно

Етизэсь, пиналэсь пужейёс?

Яке, шуом, пужейпиос?

Мусое, пие,

Я марлы туннэ артэ тон овол?

Ех-хо-хо-хов!

Сюлмез секыт кариз та гожтэтэд.

Ех-хо-хо-хов!

 

Пужей сярысь триптих.

 

1.

 

Пужей вордись ватскем

Куакъёс полы, пужейёссэ чакла

Но малпаське:

«Кхей, алдай мон сюроме,

таре уг адзы со монэ…»

Нош пужей ас вактаз

Ягельзэ сыске:

«Кхей, мар мылыз потэ –

ойдо мед малпалоз…»

 

2.

 

Пужей, со – кос улвай кадь писпуын,

Шодтэк йотскод но – тиялскоз.

 

3.

 

Адями малпа – пужейлэсь улонзэ

Со гинэ быгатэ радъяны – адями.

Нош пужей тодэ огзэ –

Пужейтэм адями, со – оволгес на адями.

 

Мазутэн наштаськем триптих.

 

Мувое веттылэм пилем.

 

Кылбур сиземын Мирнинской УБР-ысь

буровой мастерлэн Пахомовлэн  бригадаезлэн

сюлмысь тыршыса ужамезлы. Соос портизы

Ватьёган шур дуре Повхов нефтепромыселлэсь

К-8 нимаськись объектэз. Та но мукет

нефтепромыселъёс сэрезэ нимамын вал ЛУКОЙЛ,

шуыса.

«Арлы быдэ, тулыс ву тудзыку, Ватьёган шур кузя, Повхов месторождение палась ву вылти зок шобырен мувой – нефть ваське. Милем туж секыт луиз улыны».

Та палъёсын улисьёслэсь Аган сельсоветэ  вазиськонъёсысьтызы.

1982.

 

Ватьёган шур кузя

Уяса ваське

Нефть –

Мувой.

Мувой.

Пыжез но, калтонэз но,

Полысэз но супырак котмытиз ни

Мувой.

Чипеез но кырод но –

Пуртэд мувоен наштаське.

Чай посьтыны –

Кытысь меда ву вайыны?

Нокытысь.

Пужейёслэн но пыдъёссы

Пырсатскизы ни

мувойын

мувойын

сьод мувойын.

Бускельёс дорысь но

Сычеесь ик уродэсь –

Ялан но вуо иворъёс.

Сьод куакалэн но котыз

Сучырмем ни мувойын.

Инмысь пилем но сьодэктэм

Мувойлэсь, мувойлэсь.

Чумлэн сэзыяз –

Сьод мувой виштыос.

Нюлэсме но гожмазы

Мувойё киросъёс.

 

Нош тон, мусое,

Пичи дыро пужейпие,

Марлы сыче курыт тон бордиськод?

Я, вай, паньсам нырдэ гылто

Чукна усем лысвуосын.

Мутация.

 

– Артысь стойбищеын кутиллям, пе, калтонэн паймымон чипеез. Солэн, пе, синъёсыз вылын, кык пичиесь сюр-лёгъёсыз вань, нош ныр вылаз ньыль пасьёс – кык интые.

– Дехей-хов! Зечлы овол та ишан…

Песятаен вараськонысь.

 

Кык йыро пойшур –

Инкузь эсэпез-йылолэз

Таркан. Со ик – мутация.

Кык ымныро луэ-а адями?

Таиз но эсэпез тиян

Мутация овол меда?

 

Толон кутизы чипеез –

Син вадьсаз сюръёсын.

Туннэ кутом язь – кыныез,

Синмыз – палаз котурдэсаз –

Камбалалэн сямен.

Нош чуказе кутом юшез –

Шурысь юсез кык йырозэ,

Одигеныз со йырыныз

Сисъяллялоз шакасэныз

Шур вуосты.

Мукетыныз нош йырыныз –

Шакас пыртиз чылкытатоз

Нефтепроводъёсысь Шуре

Кисьтиськылись сьод мувоез.

 

Оло нош со мутацизы

Радиация гинэ но овол.

Мувой зарезен шобыртэ ке

Ассэ но зарезез, шурез –

Югдур уз ортчы ни мутацитэк.

Мувой портон буровойёс

Ялан шимес чындо ке инбаме –

Мутацитэк ортчоз меда югдур?

Ядо вуос но мылесъёс

Городъёсын овол ке калтэмын –

Мутацитэк ортчоз меда югдур?

 

Йырси ик, ява, пежырске –

Таче но шимес суредэз

Син азям ке шуак пуктисько:

Тани мынам песятае

Одиг киын пужей вылэ

Тынзян – сьолтэт куштэ.

Кыкети киыныз –

Кекатыса кыске бордаз

Со пужеез,

Пыдъёсыныз пыкъяськылэ музъем борды…

Куиньмети киыныз

Со позыртэ пужеезлэсь сюрзэ,

Куинь луэм кылъёсыныз

Нюлышъяса октэ ини

Пужей йыр чашаысь вимзэ.

Сыче дыръя

Солэн огез синмыз кырмекъялля

Шумпотонэн ческытослы лоптылыса.

Мукет синмыз

Оте монэ сыче сэбед дораз.

Куиньметиез синмыз

Акар учке пужей уллё полысь

Выльзэ но мукетсэ

Курбон…

 

Адямиос!

Оло сыче мутация

Кутскиз ни улыны асьме пушкын?

Овол на ке но –

Кык йыроесь но куинь киё

Адямиос, асьме поламы улисьёс…

Шодтэк улсын кусыпамы

Мукет адямиен но инкуазен

Пыриз ни со мутация…

Мылкыдамы, ужъёсамы,

Ог-огместы валанамы?

 

Медло на вал сыче вакытмы,

Вуоно ик на вал –

Ас шорамы асьмелы учкыны.

 

Огдырлы город.

 

Когалым-Лор ханты кылысь тазьы берыктиське: «Ты, Кытын Йылпумъяськиз Воргорон». «ЛУКОЙЛ»-ысь нефтянникъёс валатэк-а валаса-а озьы нимазы асьсэ удыссылэсь шоркарзэ.

 

Мувой коньдон яркыт пиштэ,

Палэнэгес чумъёс палдуртэмын.

Хант серекъя тангыралэн зараз,

Нош ненец мыня синлысаз –

Кулэм интыын

Кулэм город

Вуоно чоньдоно нуналэн данъяське.

Часталы адямиос

Часталы баръёсын

Частазэ суръёсты юыло –

Та гинэ дырлы.

Аксымен куальккето.

Ог дырлы усьылэм даурысь

Пельпумъёс вылазы

Усьылись минутлэсь мугорзэ

Пужейпи гинэ тини

Уг валатскы аксым кариськыны,

Солы зечгес –

Анаеныз артэ жуйез копышъяны.

Солэн синъёсаз –

Сюрсъёсын ортчылэм дауръёс.

Солэн синъёсаз –

Сюрсъёсын лыктылись дауръёс.

Гижыеныз со чабыштоз

Сюрвыл лёгвыръёссэ.

Нош собере эркын

Со кызялоз кортлэн сынэз вылэ,

Нефтепровод вылэ.

 

Кеськон.

 

Городэ кошкем эшелы, кудиныз

чош будимы.

 

Зеч пужей нырысети лымы усемен чош

берытске отчы, кытын вордскиз.

Ненецъёслэн мадиськонзы.

 

Нырысети усем лымы вылти

Ас уллёяз оз берты ке пужей

Иське, сое кесязы, мискинез,

Кионъёс яке росомаха.

Тодьы быжо орзи

Куштиз ке пузкарзэ –

Иське, шедьтиз адямитэм инты.

Нош мынам Юсе – сузэре

Егит карылись тулыс кырзанэн

Оз ке берга чуме вадьсын-вылиосын  –

Иське, быриз, мискинь, со кытын ке

Пычал гудыртэмлэсь…

Нош тон овол ке

Куанер, нодтэм пойшур

Яке оти-тати лобась тылобурдо,

Быдэс ке бурдъёсыд…

Озьы ке но – од вайы ке тодад

Анай гердо интыостэ,

Кыче мугез меда тон малпалод

Аслыд ачид?

 

Тодьы кеськонъёс.

 

Кылбур сизиське интернатын

чош будэм ёзэлы.

 

Тынад песятаед юсьёс вылэ

Пойшуралляз. Пайдаё – дэлето

Пойшурась – нимыз вал солэн.

Сое озьы ик – зеч адямиен

Котыр ёросъёсын карылизы.

Секыт, кезьыт вакытъёсы

Солэн выжыысьтыз адямиос

Дисяллязы юсь тылылэсь-гонлэсь

Диськутъёссэс.

Ой вал но соослэн пужейёссы,

Сион курылизы нылпиоссы.

Соин сэрен, гужем куазен

Арлыдоос люкаллязы толлы

Юсьлэсь сильзэ тросо лыдын.

Пужей силез соос понна

Юсь силь, пе, воштылиз.

Возьылизы соос сильзэс кынын,

Жуйы улын, шуналлямтэ музъем пушкын.

Оло соин но-а улэп кыльылизы?

Тынад но агаед юсьёс вылэ

Пойшуралляз…

Геологъёс кышнооссэс эркиязы

Зок коньдонэн… Нош соосыз –

Котрес берпало кенакъёс,

Агайдэ сектаса кабак винаен,

Солэсь басьтылизы ньомлы дунын

Вирен наштаськылэм

Юсь куосты…-

Чебересь изьыос вуризы

Асьсэлы, нылъёссылы.

Нош чуказеяз тынад агаед

Макмырен пилиськись йырыныз,

Жуась лулыныз но

Бушам жушыныз

Кошкылиз палэнысь тыосты…

Отын со нош ик йыркурен

Тодьы кеськем куараосты

Борсьысь борсьы чик жалятэк но

Ыбылиз…

Унооссэ коштанъёсты со дисялляз

Мамык юсё изьыосын но

Дисьёсын…

Но малы ке но агайдэ

Нокин оз нималля

Пайда–Дэлет Пойшурасен…

Сэре нош врач гожтиз солы:

«Отравление алкоголем…»

Со гинэ овол…

Агайдэ ватыкумы вань стойбище вадьсын

Чузъяськизы быдэс но тодьыесь,

Куанисесь но оло – мыным озьы потылизы –

Юсь ымъёсысь кеськылонъёс…

Куштэм лапас.

 

Мегионысь «Югра» парк-музей

кылдытисьлы

Виктория Сподиналы сизисько.

 

Пыдын ветлон сюрес

Тани ожоен инизэ шобырскем.

Ог кызь арзэ ини

Кыткет вылаз оз вуылы

Татчы Кузё.

Оло со вунэтиз ни лапассэ?

Оло ачиз чиптэм-чаптэм

Ышиз?

Оло вордскем шаеръёссэ

Со вунэтиз ини?

Лекен чусомемын

Пужым но яг артысь.

Тубат но куаразэ уг сёт,

Музэ гачолскемын –

Усем.

Ошмес пыдэс но куасьмемын,

Кырзан солэн уретскемын.

Возти ортчись но адями,

Кудиз оло мае-сое тодэ

Лапас Кузё сярысь –

Номыр уг вазьылы,

Сылэ – йырзэ ошем.

Та вакытэ уг шедьы кыл

Аслым но…

Гуньдэмын.

Тылскем дорысь триптих.

 

Шумпотон но куректон артын уло.

Ненецъёслэн мадиськон.

 

Бадзым шумпотон туннэ

Стойбищеын –

Агае чум пушказ

Телевизор басьтиз.

Гурын жуась писъёс

Тарскетизы.

Экран азьын пичильтокъёс

Сумбыр карылизы…

Нош песятай чалак пукиз

Вужер пушкын но ангессэ

Кормышъялляз но маялляз.

Чагыр экран вылын

Огез борсьы мукетъёсыз

Фильмъёс ортчылизы.

Бадзым дуннелэн серекъямез,

Куректэмез, бордонэз но кырзамез

Пичи дуннеямы тымиськыса

Вуылизы…

Нош песятай номыр но вератэк

Пукиз. Ас вужераз.

Синкачъёссэ кунэртылиз,

Ангес гопсэ гижыеныз йоттылыса –

Ини оло муромытиз сое…

Нош ву усён вадьсын

Лобаз юг парашют

Пилем сямен,

Тылобурдо сямен.

Оло-а унябей кидыс сямен…

Чыжы – выжы тусъёс вошкылизы:

Анаелэн,

Нылпиослэн,

Агаймылэн,

Бускельёслэн.

Вань калыклэн, кудиз лыктиз

Выль арбери шоры паймытскыны:

Эсьма, ява –

Песянайлэн но тус паймем кадё

Луиз…

Нош песятай паймылытэк

Пукиз ас вужераз – югдаз,

Вактаз…

Со кунэрес туннэ. Пильмо

Малпан кугзаз йыраз.

Чусын кормаз со ангессэ,

Уно тыбыр борддор сьоры

Кариськыса.

Нош жытазе ни песянай

Мыным сипыр кариз пелям,

Медам, пе, нокинлы вера

Та иворез –

Толон

Буровое нуись сюрес вылын

Песятаймы лымы улысь шедьтэм

Йыртэм карем пужейёсты,

Кык шойёсты.

Жыны толэзь талэсь азьло

Со пужейёс ышылэмын вал

Бускельёсмы дорысь…

 

Пересь Устилэн чигиськонэз.

– Айваседа выжыысь пересь Устилэн кылем тол кутскон азьын бадзын куректонэз луиз:

– Мар сыче?

– Ватьеган шур дурти ягъёсын коньыосты пойшура вылэм. Нош нефтепровод самой со ягъёс пыр ик кыскемын. Мынисько, пе, пужейёсын кынмем ты вылти. Шуак ты оз чида, тарс чигиз йоэз…

– Дехей-хов! Цок-цок-цок-цок!

– Сыче-таче ой кушетскы вал,- шуэ…,- тодско, пе, – татын вуэз пужейёслэн котозязы гинэ. Йыр пужейме валти ярдуре… Нош мар тамаша? Кисае но, малицае но, пужейёсы – сьод-сьодэн шуакысь буяськизы. Нош котыр сыче кош, ява, зын паке, нырпелесэз ик бералтэ… Киме ымныр дорам кари – сьод кой, сьод мувой…

– Пиманс-кучахку! Ёх-хо-хо-хов!

– Тини озьы… Ты вылымтэ со, мувоен тырмытэм котлован вылэм… Авария луыса, мувой вань тыэз шобыртэм, сэре вылаз лымы усем… Коня вырим на пужейёсмес сузяны! Ойлась. Кулизы. Нош кузёзы улэп кылиз. Только синтэм луиз пересь Усти.

 

Мар ке но туннэ

Пельпумъёсы секытазы,

Гадьын но пачкатэ,

Сюлэм висе,

Йыр пилиське восьлэсь.

Овол ни зеч улон –

Нап-чуж Шунды

Шобыр сьорын.

Овол ини мыным изён –

Толэзь сюрло чын пыр.

Шунды пуксьыку –

Ум овол.

Шунды жужаку –

Сайкантэм.

Нокытчы, нокытчы, нокытчы

Пыр мугорез сисъяллясь

Вось луонлэсь пегзыны!

Оло озьы –

Песянайлэн шой тузонэз

Пырсатиське та тундрае,

Питыранъёс улысь толиськыса,

Сэре черла жуй-ягельлэн куараеныз

Чидамтэен вось луонлы.

Киоссэ, пыдъёссэ

Кедрапу волмытъяса,

Пурысьтам куараен, песятай куараен

Кесяське ёросэ,

Юрттэт курыса.

Ваньмыз выжы но кумые

Куке но пужей вордылись калыке,

Курадзыса мегдомылэ

Лысвуэн но зорен

Сьод висёнэз гылтылыны,

Гадьзэ тазартыны.

Жуштылэ секытэн

Кулоно кадь восьлы чидатэк.

Жуштыны гинэ-а меда

Кыле на кужым,

Нырпелесэз сузяны – сьод макеен

Чоксамез.

Жуштэ синвуосын.

Нош синвуос интыосын –

Сьод шопыльто мувой

Ты – шапыкъёс…

Песятайлэн пужей утёнтиез

Гудзылэмын но таркамын,

Вылаз ик на – пуштытэмын.

Ваньмыз тымылэмын сьодэн –

Бердэ ик учкыны уд ву.

Азьвыл чылкытэсь шуръёс но тыос

Ваньзы – паньсамын, быдтэмын.

Дасопол ни оло

Косатъямын –

Дыр ик овол малпаны!

Песятайлэн пужым ягез но

Корамын, сутэмын.

Дыр овол! Дыр овол!

Малпаськыны?!

Туннэ нош ик Шунды пуксёнын

Уз лыкты изён но дорам…

Чуказе чукназэ –

Ум но сайкалэ, дыр…

Нокытчы, нокытчы, нокытчы

Та йырез ватыны,

Вось луонлэсь сое утьыны.

 

осё ягын.

 

Асьме выжы калыкъёс берло дыре

дугдизы ни Вось интыосы ветлэмысь.

Куддыр гинэ татчы вуыло мырдэм

вамышъясь пересьёс… Соос но  восяськон

кылъёсты но сурало ини… Вуыло  акар

муртъёс но…

Чыжы-выжыослы гожтэм чуръёсысь.

 

Восяськы…

Оло нош тынад кылъёсыд

Кылэмын луозы…

Озьы – Нюлэсэз Утьылись

Нош ик оло

Нюлэсэз сайкатоз но жутоз –

Корамысь, лиялысь…

Восяськы…

Оло тынад кылъёсыд кылэмын луозы…

Озьы – Выжыез Утисьмы но оло

Кулэм-быремъёсты улзытъялоз –

Аракые выемъёсты, аракыын жуамъёсты.

Восяськы…

Оло нош тынад кылъёсыд

Кылэмын луозы,

Озьы соку –  Аган Кузё Кышно

Чылкытатоз наштам тулкымъёссэ,

Ярдуръёссэ.

Бордаз улэм но алиын

Улись улэпъёссэ…

Мыло-кыдо туннэ восяськеме потэ

Ас поннам но,

Нылпиосы но понна,

Соослэн но нылпиоссы но понна…

Восясько на мон

Обь шурамы куамынэти аръёсы

Вось понна выйтылэмъёс сярысь.

30-ти,

40-ти,

50-ти аръёсын но…

Нош Инмаръёс уг сёто

Куаразэс. Чалмыт сыло.

Соослэн пыдкутсы лушкамын,

Вань котырзы таркамын,

Шоразы пычалэн ыбемын.

Пуштросэз:

 

  1. «Ачим сярысь…» Юрий Вэлла.
  2. Чуквыл триптих.
  3. Вазез триптих.
  4. Тулыс триптих:

Портэм буёло инбам.

Сыче портэм инбам.

Весяклы инбам.

  1. Песянае сярысь триптих.

Нанги песянаелы.

Нанги песянаелэн кырзанэз.

Чал-Чалмыт.

  1. Кырзанъёс:

Пужей вордисьлэн кырзанэз.

Пужей вордись пересь Аулилэн кырзанэз.

Пересь Ымчилэн пиезлэн гожтэтэз сярысь опкелёнэз.

  1. Пужей сярысь триптих.
  2. Мазутэн наштаськем триптих:

Мувое веттылэм пилем.

Мутация.

Огдырлы город.

  1. Кеськон:

Городэ кошкем эшелы, кудиныз чош будимы.

Тодьы кеськонъёс.

Куштэм лабаз.

10. Тылскем дорысь триптих.

Телевизор азьын.

Пересь Устинлэн чигиськонэз.

Восё ягын.

 

Аннотация.

 

Юрий Кылевич Вэлла туннэ пыре Сибирьлэн Шунды пуксён палысьтыз валтись гожъяськисьёс, солэсь туала литературазэ кылдытисьёс полы. Дунне шоры ненец синмын учкыса, со вань ужпумъёсты аспортэмлыко, ас сяменыз адзыны быгатэ. Солэн валтись героез гогыеныз ик бурмемын Инкуазь борды. Озьы со быгатэ та дыртись даурмес шунытгес карыны но асьме сюлэмъёсамы жалянэз улзытыны. Угось, ведь ваньмы асьмеос чуказе нуналмы понна кыл кутиськомы, уката ик нылпиосмы но азьын. Сыче мылкыдын ик Удмурт Элькунысь Калык писатель Вячеслав Ар-Серги но Юрий Вэллалэсь кылбуръёссэ удмурт кылэ берыктиз.

 


[1] Модей – йоспортэм.

[2] Окыныса – лулыз ик потыса, юн, зол.

[3] Аксым – коттырмостэм.